जहांगीर रुग्णालयात अत्याधुनिक रोबोटिक गुडघा प्रत्यारोपण तंत्रज्ञान

पुणे : पुण्यातील जहांगीर रुग्णालयाने आपल्या अ‍ॅडव्हान्स्ड रोबोटिक ऑर्थोपेडिक सर्जरी क्लिनिकद्वारे अत्याधुनिक रोबोटिक-असिस्टेड गुडघा प्रत्यारोपण शस्त्रक्रिया सुरू केल्या आहेत. या शस्त्रक्रियेचे उद्दिष्ट म्हणजे शल्यक्रियेत अधिक अचूकता, सुरक्षितता आणि रुग्णांच्या परिणामकारक पुनर्वसनात सुधारणा साधणे. रुग्णालयाचे हे नवीन केंद्र अत्याधुनिक रोबोटिक तंत्रज्ञान आणि वरिष्ठ अस्थिरोग तज्ज्ञांच्या अनुभवाचे संयोजन करून टोटल (पूर्ण) आणि पार्टियल (आंशिक) गुडघा प्रत्यारोपण शस्त्रक्रिया अत्यंत अचूकतेने पार पाडते.

पारंपरिक गुडघा प्रत्यारोपण शस्त्रक्रिया प्रामुख्याने शल्यविशारदाच्या हातोटीवर आणि मोजमापांवर अवलंबून असतात. त्या प्रभावी असल्या तरी कधी कधी सूक्ष्म त्रुटींमुळे प्रत्यारोपणाच्या कार्यक्षमतेवर आणि टिकाऊपणावर परिणाम होऊ शकतो. रोबोटिक-असिस्टेड शस्त्रक्रिया या जोखमीपासून मुक्त असते, कारण ती अत्याधुनिक त्रिमितीय प्रतिमा (३डी इमेजिंग) आणि रोबोटिक अचूकतेचा वापर करून शल्यविशारदांना प्रत्येक टप्प्याचे अचूक नियोजन व अंमलबजावणी करण्यास मदत करते.

जहांगीर रुग्णालयाच्या माहितीनुसार, रोबोटिक गुडघा प्रत्यारोपण या तंत्रामुळे अनेक फायदे मिळतात. यात प्रत्यारोपणाचे अचूक स्थान व संरेखन, अल्प आघातकारक पद्धत, छोट्या चिरांमुळे कमी ऊतक हानी, शस्त्रक्रियेनंतरचा कमी वेदनादायक कालावधी आणि जलद पुनर्वसन हे महत्त्वाचे फायदे आहेत. तसेच रुग्णांना अधिक नैसर्गिक हालचाल, सांध्यांची सुधारलेली कार्यक्षमता आणि पुन:शस्त्रक्रियेचा कमी धोका जाणवतो.

या दोन शस्त्रक्रियांमधील फरक स्पष्ट करताना रुग्णालयाने सांगितले की, टोटल नी रिप्लेसमेंट (टीकेआर) ही शस्त्रक्रिया संपूर्ण गुडघा सांध्यातील प्रगत संधिवात असलेल्या रुग्णांसाठी शिफारस केली जाते. या प्रक्रियेत नुकसानग्रस्त अस्थी आणि कूर्चा काढून त्याऐवजी कृत्रिम सांधा बसवला जातो, ज्यामुळे दीर्घकालीन आणि टिकाऊ आराम मिळतो. पार्टियल नी रिप्लेसमेंट ही प्रक्रिया मात्र फक्त गुडघ्याच्या एका भागात मर्यादित नुकसान झालेल्या रुग्णांसाठी उपयुक्त असते. या पद्धतीत निरोगी अस्थी व ऊतक जपले जातात, तसेच जलद पुनर्वसन आणि अधिक नैसर्गिक हालचाली साधता येतात.