पुणे : अॅग्रीकल्चरल डेव्हलपमेंट ट्रस्ट बारामती, भीमथडी फौंडेशन व महात्मा फुले कृषी विद्यापीठ राहुरी यांच्या सयुंक्त विद्यमाने महिला बचत गटांना हक्काची बाजारपेठ मिळवून देणारी भीमथडी जत्रा आजपासून पुण्यातील सिंचननगर येथील कृषी महाविद्यालयाच्या मैदानावर सुरू झाली.
या वेळी भीमथडी जत्रेचे उदघाटन आयोजक सुनंदा पवार, खासदार सुनेत्रा पवार, महात्मा फुले कृषी विद्यापीठाचे कुलगुरू डॉ. विलास खर्षे, बचत गटाच्या जयश्री निकम, दीप्ती पवार, सुरेखा शिंदे, अश्विनी ननावरे आदींच्या हस्ते झाले. रजनी इंदुलकर, पुणे जिल्हा मध्यवर्ती सहकारी बँकेचे चेअरमन डॉ दिगांबर दुर्गाडे, महात्मा फुले कृषी महाविद्यालयाचे प्राचार्य डॉ. माने, सई पवार, कुंती पवार, ऍग्रीकल्चरल डेव्हलपमेंट ट्रस्टचे सी इ ओ निलेश नलावडे, पुणे जिल्हा मध्यवर्ती सहकारी बँकेचे उपाध्यक्ष सुनील चांदेरे, कार्यकारी अध्यक्ष अरुण देसाई उपस्थित होते. या वेळी जवळपास 40 पेक्षा जास्त ढोल वादकांनी ढोल वाजवून या मान्यवरांचे स्वागत केले.
देशी फुले ही भीमथडीची थीम असल्याने भीमथडीत जवळपास 30 पेक्षा जास्त देशी फुलांची रोपे पुणेकरांसाठी प्रसिद्ध मुघल गार्डनच्या धर्तीवर मांडलेली आहेत. त्या मध्ये बारमासी मोगरा, मोती मोगरा, कुंद, कागडा, जुई, बोगणवेल, जास्वंद, कण्हेर, आनंत, रातराणी , गणेशवेल, तुळस, टणटनी, शेवंती, कर्दळ, झेंडू, गुलाब, बटन गुलाब, संक्रात वेल, तेरडा, फाउंटन ग्रास, सोनचाफा, पारिजात, थाई कुंद, हळदी कुंकू टनटणी, झिनिया, कॉसमॉस, अबोली, निळे व जांभळे कृष्णकमळ, काश्मिरी गुलाब इत्यादी प्रकारची फुलरोपे लक्ष वेधून घेतात.
दरम्यान भिमथडीला आमदार रोहित पवार, सकाळ उद्योग समूहाचे प्रतापराव पवार यांनी भेट दिली.
जत्रेत शेतकरी दालन, भीमथडी सिलेक्ट, स्वयंसिद्धा दालन, कला संस्कृती- आकर्षक रांगोळी व शाकाहारी- मांसाहारी पदार्थांची रेलचेल अशी भरगच्च भीमथडी पुणेकरांच्या भेटीला आलेली आहे.
भीमथडीत जेष्ठ नागरिकांसाठी व्हीलचेअर उपलब्ध असून संपूर्ण भीमथडी जत्रा “नो प्लास्टिक झोन” असणार आहे. पाळीव प्राणी, जेष्ठ नागरिक व लहान मुलांनाही या वर्षी भीमथडीचा अनुभव घेता येईल. पुणेकरांचा उत्सव असलेल्या या भीमथडीला जास्तीत जास्त पुणेकरांनी भेट द्यावी असे आयोजकांतर्फे आवाहन करण्यात येत आहे. www.bhimthadijatra.com या वेबसाईटवर पुढील 5 दिवसाचे ऑनलाईन तिकीट बुक करता येणार आहे.
टिप्पणी पोस्ट करा